Lyrics: Amajambo y'indirimbo
Rindira gato...


Agahogo k'Abarundi

Urupfu rwa Maconco


Ukubabara kurababaza ye nyabura
Ugutonekara kutaraza
Uwo rero muramwumva
Yari nyina ngo oya wiwe
Ati mbega mwananje mwananje we
Ati nyamara mwananje
Numbarire ikikubabaje
Ko wama wicurikira

Ati ukurya ntikubuza ukuganya ge mawe we
Imbiribiri ntibuza intimba
Ntawuhora aho yabaye

Nyina wiwe akamubarira mwananje we
Ati sigaho mwananje
Tega amatwi ndakubarire
Yaco uba wigira igifyine

Ati so wawe mu guhwera mwananje we
Yaravyutse mu gitondo
Gutabara ngo urugamba
Urugamba rwatewe
Arajabuka ca cuzi mwananje we
Arakubita ngo aratemba
Aca aratemba nk'amazi

Ati none mwananje
Tega amatwi ndakubarire
Nkubarire abamenje
Ati nkubarire abamenje mwananje we
Ndakubarire abamenje

Ati Maconco mu kumenja mwananje
Yari umukwe ngo w'umwami
Yaravutse ari umwana
Aragenda ku kirimba
Oya umwami amubonye
Aramugomwa aramugabira
Amuha umugeni wiwe aramutwara mwananje we
Amuha n'inka aratwara
Ati mbega Maconco
Amuha ngo n'ikirimba
N'intara yatwara

Hamwe Maconco yatunze mwa bantu mwe
Mutege amatwi ngo muvyumve
Hamwe Maconco yatunze mwa bantu we
Aragenda kwa sebukwe
Aravyuka mu gitondo
Umugore atamubarire
Aratura ku kirimba
Kwa sebukwe wiwe

Sebukwe ngo akimubonye mwa bantu mwe
Atangura ngo kumuranutsa
Oya kandi arapfuma
Mwananje ga Maconco
Je ndagize ngo bwakeye

Ngo Maconco aramusubiza mwa bantu mwe
Bwakeye databukwe
Ati nyamara databukwe databukwe we
Je naraye ngo ntaryamye
Oya intezi zanteye
Raba ngo ufise imbwa zibiri databukwe we
Oya Mucebo na Rurebeya
Jewe ndayikuzamvye
Ngusavye iyo mbwa yawe
Iyo mbwa nkuru ya zosi
Oya uyimpe ndayitware

Sebukwe ngo avyumvise mwa bantu mwe
Araheza ngo agira ubwoba
Ati mbega Maconco
Narakugabiye mwananje ga Maconco we
Ati ehe raba Maconco
Nguhaye umugeni wanje ga Maconco
Naguha intara uratwara
Ati n'ubu mwananje ndakugabira
Ngo ntugenda ntakugabiye
Ndaguhaye zirya zonsa
Izo nyene ndaziguhaye
Ndaguhaye n'igihugu natwara cosi
Ico cosi kibe rwawe
Eka singuha rurebeya mwananje we

Ngo Maconco aca ararahira
Ati databukwe ndakubariye je Maconco
Ukabona utayimpaye
Jewe ndagiye iwanje
Kandi nshika niyahura

Ngo Maconco aragenda
Afata akayira aragenda
Ashika i muhira iwiwe
Umugore akimubonye
Atangura kumuramutsa
Arapfukama aramuramutsa
Ati nagize bwakeye

Ngo Maconco arihorera
Umugore arashishikara
Ati ndagize bwakeye
Ngo Maconco arihorera
Aragenda ku kirambi mwa bantu mwe
Arasasa ngo araryama
Umugore bitavuganye
Ikiyago bitayaze

Hama igicugu caciye mwa bantu mwe
Igicugu ngo kiraciye
Umugore riramuniga
Abaza umugabo wiwe
Ati mbega Maconco
Ati mama w'umukondo
Numbarire ikigushavuje
Numbarire ikigushavuje

Ati sigaho mugoranje mugoranje we
Jewe ubona aha natumvye
Aho nava kwa so wawe
Kandi ari we databukwe
Aho nava kwa nyoko wawe
Kandi ari we ngo mabukwe
Nabasavye irya mbwa yabo
Irya mbwa nkuru ya zosi
None barayinyimye
None ngira niyahure

Umugore ngo aryumvise mwa bantu mwe
Ati sigaho ga Maconco
Sigaho ntiwiyahure
Je ndagiye sindayisiga

Amena igicugu aragenda mwa bantu mwe
Aratura ku kirimba
Kwa sebukwe wiwe
Ari we se wa Maconco
Asanga nyina wiwe yicaye kw'irembo mwa bantu mwe
Ngo se wiwe ntari muhira
Nyina wiwe agira ubwoba

Ati mbega mwananje
Ati mbega uzanywe n'iki
Numbarire ngo ikikuzanye

Ati sigaho ge mawe ge mawe
Ayo mwakoze ntarindwa
Aho Maconco yava ng'aha ge mawe
Ngo n'ukurya ntiyariye
N'ukuvuga tutavuganye
Ikiyago ntituyage

Ati mbega mwananje
None tubigire nte
Ati ehe raba mwananje mwananje we
Ngo Maconco ndakubarire
Twamuhaye umugeni wacu mwananje we
Tumuha intara aratwara
Ashime ivyo twabahaye

Umukobwa avyumvise
Ati mbega ge mawe
Ati umukwe wanyu
Muramuhevye yiyahure
Ngo Maconco ukabona ngo ariyahuye
Ngo na jewe ngo sinsigara

Nyina wiwe avyumvise
Ati sigaho mwananje
Sigaho ngo ntiwiyahure
Genda uziture uyitware mwananje we
Uyitware mu kirimba
Ngo so wawe agataha
Na we nyene ngo ariyahura

Wa mukobwa aragenda
Arayizitura mu kirimba
Arayifata arayitwara
Yarateye mu gahinga mwa bantu mwe
Akamwemwe karamwica
Apfukura araba
Ati Rurebeya ndagutwaye

Yarashitse i muhira iwiwe
Ashitse ngo i muhira iwiwe
Amusanga araryamye
Ntarava ku kirambi
Ati Maconco nuvyuke mugabo wanje we
Ico waririye ndakironse
Ngo Maconco abibonye
Ava hasi aramuramutsa
Imbwa ayishira ku kirimba
Akubitira umuryango

Naho umwami ngo arataha
Mwa bantu ngo muvyumvye
Mbabwire kandi uko vyagenze
Nayo umwami arataha
Arashika kw'irembo
Ahamagara imbwa yiwe
Kandi ize imusanganire
Ahamagara ngo avuga ati

Ngo ehe Rurebeya
Ahi nte Rurebeya
Nte Rurebeya
Nte Rurebeya
Nte Rurebeya
Nte Rurebeya

Aragira ngo ntiyumvise
Akomeza yegereza

Ngize nte Rurebeya
Nte Rurebeya
Nte Rurebeya
Nte nte Rurebeya we
Nte nte Rurebeya nawe
Nte Rurebeya

Arabura iyo yagiye
Yegereza mu kirimba
Aho Rurebeya yaryama

Ngize nte Rurebeya
Nte Rurebeya
Nte Rurebeya
Nte Rurebeya

Arabura iyo yagiye
Aca arabaza umwamikazi
Mwamikazi we
Rurebeya ngo iri hehe
Arasimbira mu muryango umwamikazi
Ararahira umusi mubi
Ngo ko atazi iyo yagiye

Abarira umupitsi wiwe
Shira indava aho mu rugo
Oya unsasire ngo ndyame
Ngo n'ugupfa napfuye
Rurebeya yagiye
Arasasa ngo araryama mwa bantu mwe
Ngo n'ukurya ngo ntiyariye

Yamara umwana wa Maconco
Haciye imisi ibiri
Arabarira ngo Maconco
Ati Maconco dawe wanje
Ati Maconco dawe wanje
Urabona imisi ni myinshi
Ntagenda kwa sogokuru wanje
Ntagenda ngo kumuramutsa

Ngo se wiwe aramubarira mwananje we
Uko ugenda ndakubarire
Ntuvuge ko Maconco
Oya kandi ko iri ino
Ntuvuge Rurebeya mwananje
Ukarimena ngo rirakumena
Wa mwana ararahira
Ati ekaye dawe ntayomvuga

Nyina wiwe aramubarira
Mwananje ko ugiye
Uhirarahire ngo urimene mwananje
Ukavuga ko Rurebeya
Nzoshika ngo nce ndakuniga
Ati ekaye mawe

Wa mwana afata akayira
Aragenda mwa bantu mwe
Aratura ku kirimba
Kwa sekuru wiwe
Amusanga araryamye
Ngo yaryamye ngo mu rugo

Wa mwana aramuramutsa
Aramutsa sekuru
Ati sogokuru w'iwanje
Je ndagize ngo bwakeye
Sekuru arihorera
Ati ndagize bwakeye
Sekuru arihorera
Ati ndagize bwakeye
Bwakeye sogokuru wanje
Sekuru arihorera

Wa mwana ishavu riramwica mwa bantu mwe
Ati ibi bintu sindabizi
Asubiza inyuma ngo arataha i muhira iwabo
Wa mwana sekuru ngo bitavuganye
Ashitse mw'irembo
Wa mwana arakebuka
Arabarira sekuru
Ati uranciye mu bibondo vyawe
Ndagiye ga sogokuru
Je ndagiye sinkigaruka
Sinkigaruka ng'aho iwawe

Sekuru agira akagongwe
Ati sigaho mwananje
Nugaruke ndakubarire
Ati ukubabara nababaye mwananje we
Aha ubona nasavye
Rurebeya yaragiye
Sindabizi iyo yagiye

Wa mwana aca ararimena mwa bantu mwe
Ati sigaho ga sogokuru we
Ati aho mawe yava ng'aha ga sogokuru
Yayitwaye ngo mu gikwembe
Ayishira ngo dawe

Aca ava hasi aramuterura mwa bantu mwe
Ati uragakura mwananje
Urakarererwa i Burundi
Aca ahamagara ingabo ziwe mwa bantu mwe
Urya mwana mumugabire
Muce mugenda kw'irembo kwa Maconco
Ngo mukore ngo ico mushaka
N'ukukmenja yamenje

Za ngabo ziragenda
Ziratura kw'irembo
Kw'irembo kwa Maconco
Umugore wiwe abibonye mwa bantu mwe
Yiruka i muhira iwiwe
Ati ngaho Maconco
Ngaho ngo turatewe
Sobukwe araguteye
Oya genda utabaze
Utabaze ugutwara

Amena ikirimba aragenda mwa bantu mwe
Aragenda kwa Digidigi
Ati nyabuna ga Digidigi
Databukwe aranteye
Anteye n'ingabo ziwe
Oya ngwino ngo untabare

Digidigi ngo agira ubwoba
Ati genda ubarire Kanugunu
W'i Busumbura ga Maconco
Azoze agutabare

Afata ibarabara ry'Abadagi mwa bantu mwe
Aratura ngo i Busumbura
Nyabuna ga Kanugunu
Databukwe aranteye
Hamwe n'ingabo ziwe
Oya ngwino untabare
Kanugunu agira ubwoba mwa bantu mwe
Ariko aremera aragenda
Ati yamara ga Maconco
Oya hogi iyo tugende
Yakira ibikoti yari afise mwa bantu mwe
Abishira ngo mu kwaha
Ashira ibasitori
Ayitwara mu kwahwa

Bafata inzira baraduga mwa bantu mwe
Baratura mu Maramvya
Kanugunu agira ubwoba
Ati sigaho ga Digidigi
Niwumve nguhanure
Genda wubahe sobukwe
Akugabe akuganze ga Maconco we
Yaguhaye intara uratwara ga Maconco we
Aguha n'umugeni wiwe

Ngo Maconco avyumvise
Ngo ndapfuye
Ahita icumu yari afise ry'ingobe ngo mwa bantu mwe
Aritera ngo Kanugunu
Rica mu kwaha riramuhusha

Kanugunu yakira ibasitori ngo mu kwaha mwa bantu mwe
Ayikubita mu gahanga
Mu gahanga kwa Maconco
Ati umumenja turamwishe

Mwezi Gisabo
Umwami Mwezi Gisabo
(1850 - 1908)


Inanga
Inanga


Ibasitori (Pistolet)
Ibasitori (Pistolet)